Біябурбалка — гэта навукова-папулярны падкаст пра біялогію, у якім можна пачуць адказы на простыя і складаныя пытанні пра прыроду, навакольнае асяроддзе і штодзённае жыццё.

Напрыклад:
Ці вучацца жывёлы адна ў адной? (І ці можна навучыць чаму-небудзь дрожжы?)
Як птушкі вучацца спяваць? (І ці ёсць у іх традыцыі?)
Як зразумець, ці куслівая муха? (І навошта на Зямлі мухі?)
Чаму Нобелеўскую прэмію па Фізіялогіі і медыцыне далі біёлагу? (І што агульнага паміж ДНК і паваранай кнігай?)

Чаму ў працэсе эвалюцыі ўзніклі два полы? (І чым цікавыя палавыя зносіны крэветак?)

Аўтары разам са слухачамі будуюць ўтульнае анлайн-асяроддзе, дзе кожны слухач можа задаць сваё пытанне біёлагу і атрымаць на яго адказ. А таксама да ўдзелу ў выпусках запрашаюцца беларускія навукоўцы, якія працуюць па ўсім свеце!

Падкаст ствараецца для вучняў сярэдніх і старэйшых класаў, а таксама іх бацькоў.
Біябурбалка аб’ядноўвае людзей розных узростаў і напрамкаў дзейнасці, якія цікавяцца біялогіяй, а таксама беларускай прыродай, мовай і культурай.